政情:新同盟退黨潮持續 周炫瑋亦割席

泛民主派持續出現退黨潮,新民主同盟可謂數一數二咁多人割席。尋日再增一員,大埔區議員周炫瑋話身處政黨之中,處理議會同地區事務時都遇到唔少掣肘,決定退黨喎。

稱處理地區事務遇掣肘

周炫瑋今日喺社交網站發表聲明,提到當下嘅艱難時期,要守好崗位愈見艱難。佢同時愈嚟愈感受到身處政黨之中,喺處理議會同地區事務,包括早前有成員利用大埔民主聯盟嘅身份,批評辭職區議員係逃兵,都令佢覺得遇到唔少掣肘,經過再三思考決定退出新同盟。

周又重申今次退黨同區議員宣誓無關,希望大家唔好過分猜測,話會盡力做好本分直至最後一刻。周自2014年起加入新同盟,佢向前輩同黨友嘅教導同幫助表示感激,又話希望現時身陷囹圄嘅3位前黨友以及其他民主派人士可以盡快同親友團聚。