政情：本港困局重重 陳婉嫻斥官員只識避難
正所謂「關關難過關關過」，但曾任多年立法會議員嘅陳婉嫻（嫻姐）就話，覺得唔少官員係「關關經過關關閃」，面對困難只係識耍官腔、耍太極、閃咗去，唔願意改動政策去解決問題，例如遲遲不願設立失業援助金等，寄語一眾官員：「最重要唔好退縮！」
拒設失業金 未解市民之急
疫情重創打工仔女生計，但勞工及福利局一再拒絕設立「失業援助金」，被轟未有真正解決市民燃眉之急。
被問到點樣評價政府，尤其係勞福局表現時，嫻姐就話，覺得官員係唔能夠「避難」，明白香港要走出困局有難度，但強調市民唔係要求政府做晒所有嘢，只希望當局可以同民間攜手一齊解決問題。
嫻姐又講到，香港機場管理局舊年斥資20億元買機票送畀香港居民，但就話有好多本身機場工作亦活喺水深火熱之中，更點名直言運輸及房屋局局長陳帆喺呢件事上面有責任，形容佢應該要有勇氣出嚟接呢個波，幫助佢哋渡過難關。