政情：楊岳橋度鐵窗牛一 離岸兄弟贈興有骨

楊岳橋（圓圖）身陷囹圄，前黨友郭榮鏗雖已遠走加拿大，仍隔空越洋贈興。

早前被揭發取道英國，繼而偕妻兒避走加拿大嘅郭榮鏗，有傳目前正一家安頓於溫哥華。尋日郭透過社交平台發文，指楊岳橋係佢從政路上難得遇到嘅好友，如今佢身陷囹圄，身為好友只可以每日向上主禱告，祈求佢同牆內各人安好，祝佢喺亂世下生日平安。之不過，既然以兄弟相稱，點解郭榮鏗選擇自己走咗去風涼水冷嘅楓葉國，由得兄弟喺獄中過生日呢？

疑遭同囚人揶揄 「人生夠精彩未」

曾奢言悍衞司法嘅楊岳橋，喺2016年新界東補選嘅造勢大會上口輕輕一句「over my dead body！」而淪為社運界嘅笑柄。被稱為楊嘅「徒弟」、早前已經退出公文袋嘅沙田區議員黃文萱，就為佢抱不平咁話，好難想像楊嘅40歲生日要喺牢獄中度過，黃又話自己同楊認識唔深，相處最多就係一齊擺街站嘅時間，但黃都有向楊反映，議事規則一役令人失望，亦坦言自己都有同其他人一樣嘲笑過佢。不過黃認為就算唔同人對楊有唔同嘅評價，佢都唔應該成為被恥笑嘅對象喎。

郭榮鏗	黃文萱認為楊岳橋不應成為被恥笑嘅對象，但佢又坦承自己曾嘲笑過楊。

其實楊都算係政壇嘅「金句王」，2017年楊以「案底令佢哋人生變得更加精彩」嚟形容反東北案衝擊公民廣場而被判入獄嘅年輕人，從而得罪唔少社運人士。早前有傳同佢一齊還押嘅社運人士劉穎匡，獄中相遇時就揶揄佢「點呀，人生夠精彩未？」，激到楊岳橋爆粗回應。雖然有人解釋，話咁做只係苦中作樂，但若果其他囚友都用楊過去嘅金句嚟為佢慶生，唔知佢又會唔會激到爆血管呢？