政情：陳肇始離奇受傷 包住左手去立會
食物及衞生局局長陳肇始尋日喺立法會接受議員質詢時，畀人發現佢嘅左手紮上繃帶。陳嘅新聞秘書回覆傳媒話，陳肇始係上個周末受傷，並無影響工作。但陳喺乜嘢情況下受傷，就冇詳細交代。
加入問責班子後至少傷3次
陳肇始加入問責班子以來，至少第3次受傷。對上一次係前年3月，陳出席一個公開活動嘅途中，唔小心喺公眾地方嘅升降機中跣親，之後就去咗瑪麗醫院醫治，雖然有輕微骨裂，並觸及手腕舊患，但因為冇乜大礙，所以都唔使留院，打完石膏就可以返屋企休息。而喺2015年10月，當時陳仲係食衞局副局長時，就喺做健身時失平衡跌倒，令右手虎口位舟骨骨裂，要用護腕固定右手，並作為期6周嘅治療。
至於今次受傷嘅事，唔知陳肇始嘅康復期又要幾耐呢？