政情：起幢公屋 要10幾年 急巿民所急淪空談

議員促壓縮覓地程序

議員邵家輝指政府「聽落好似做咗好多嘢」，但現實係公屋輪候時間接近6年，認為政府做事應講求結果，而唔係過程。議員石禮謙亦指現時有約25萬家庭輪候公屋，天氣咁熱但仲要住喺劏房，反問點樣安居樂業呢？石認為政府應特事特辦，將輪候公屋時間縮短至3年，不單止要縮短建築時間，喺前期覓地到規劃及諮詢中亦應探討壓縮程序。

政府方面同意應加快房屋供應，話未來10年公屋供應量會顯著改善，但如果要壓縮前期諮詢程序，可能需要修改法例，喺提交立法會審議時採用有條件撥款。運輸及房屋局副局長蘇偉文就話可以喺建築方式上引入新科技，例如預製組件同採用機械人模式等，以增加生產效率喎。