政情:旅遊氣泡 一爆再爆 邱騰華唔信邪 拒認改壞名

早該知道泡沫,一觸就破?香港喺去年底同新加坡簽訂「旅遊氣泡」,曾先後計劃喺舊年11月同上個月啟動,但後來都喺啟動前夕疫情突然反彈,「氣泡」兩度爆破收場。商務及經濟發展局局長邱騰華尋日喺立法會上,就主動提到唔會考慮「改名轉運」,形容呢個問題唔係改個名就可以處理好喎!

邱騰華發言時主動提到,話好多人提及「氣泡」時都好驚佢會爆,亦有好多人建議政府應該將「旅遊氣泡」改名,邱就話:「如果能夠(靠)改個名就處理到件事當然最容易啦!」佢又解釋,「旅遊氣泡」所指嘅「唔係吹一個番梘泡」,而係以「氣泡形式」,保護各地可以喺防疫嘅大前提下,能夠保持交通、人員往來。

雖然邱騰華堅持「旅遊氣泡」並無改壞名,但佢亦即刻戴番頂頭盔,話全球最早提出「氣泡」概念嘅唔係香港,而係澳洲同新西蘭,仲話呢兩個國家之間嘅「氣泡」都曾經暫停過添!

議員轟冇個氣泡成事

金融界議員陳振英(Ronick)就話,查實依家全球都有愈來愈多「旅遊氣泡」出現,雖然港府都話要建立「航空旅遊氣泡」,之不過香港市民聽嚟聽去,都只係得同新加坡呢個「氣泡」。Ronick就鬧爆香港到依家為止一個「氣泡」都未搞得成,又關注當局會唔會考慮同多啲地方商討建立「氣泡」。

邱:不止與星商氣泡

邱騰華回應時就話,當局自去年年中到目前為止,都有同唔少歐洲、亞洲以至太平洋區域嘅國家討論過,強調並非只係同咗新加坡一個地方傾。但佢同時指出「氣泡」要建基於防疫嘅大前提,形容香港同另一地區要互相認同,以及確保對方係安全,大家先至會安心往來。

邱仲話,當局曾諮詢過衞生部門意見,以了解香港到底可以容許嚟自邊啲地方嘅人,可以透過免檢疫形式來港,但就坦言直至現時為止,實際上可以有嘅選擇唔多喎!