政情：降雨量錯報逾10米 天文台急更正
夏季為大地帶嚟雨水，但若果單日降雨量「超過10米」，唔知你又驚唔驚？天文台前晚發稿交代雨量時就唔小心報錯數，將「多處地區錄得超過10毫米雨量」，錯誤地寫成「超過10米」（即超過10,000毫米），兩者嘅差距高達1,000倍。若果單日降雨量有超過3層樓咁高，唔知市民係咪要識游水先可以出街呢？
歷來最高都係534毫米
天文台前晚11時15分發稿交代本港全日嘅天氣概況，話受低壓槽持續影響，本港前日間中有驟雨同雷暴，仲話「多處地區錄得超過10米雨量」添！翻查資料，香港歷來單日錄得最高降雨紀綠發生喺1926年7月19日，但當日嘅雨量亦只係得534毫米。換言之，按照呢條稿嘅講法，香港前日可以話係打破咗維持近百年嚟降雨量嘅歷史紀錄？
正所謂「差之毫釐、謬之千里」，打漏咗個「毫」已經相差甚遠。而發現出錯後，天文台拿拿臨喺15分鐘內再發稿更正，將雨量修正番做「超過10毫米」，費事繼續嚇親市民喇！