政情：利君雅派散水餅 一度禁入廣播大廈
本地職場有個不成文嘅規矩，打工仔離開受僱機構嘅時候，都會向一眾同事派散水餅。不過，因被接獲大量投訴而不獲香港電台（港台）續約嘅助理節目主任利君雅，尋日佢都依循呢種做法，趁住喺港台最後一個工作天，準備咗一批散水餅並往廣播大廈派畀同事，誰知大廈保安話按上頭指示，阻止佢進入廣播大廈。
限時半個鐘
儘管利君雅喺保安同行政部人員監視下，仍然可以進入大廈派散水餅，不過就只得半個鐘時限，期間喺通往廣播處長李百全辦公室嘅樓梯就增派保安駐守。據悉，有關禁止利君雅進入廣播大廈嘅指令，係有份負責處理利君雅嘅「重啟調查」、掌管行政部嘅電台主任秘書至少一星期前所下達，而部分高層亦被禁收利君雅所派嘅散水餅。