政情：短訊電騙3議員嬲到報警
騙徒手法層出不窮，一時不慎隨時中招！葛珮帆（EQ）、陳恒鑌（Ben）同劉國勳3位議員，日前分別收到附有電子支付工具「PayMe」驗證碼嘅短訊，其中Ben更兩度接獲來電，不但要求佢透露該短訊上嘅驗證碼，來電者更可以講出Ben完整嘅身份證號碼o忝。聽起上嚟真係好恐怖喎！
幸好佢哋3個今次都冇受騙，亦冇蒙受金錢損失。之不過，今次事件就搞到EQ一肚氣，事關佢喺星期日晚（23日）收到相關短訊後，覺得可疑於是打電話去PayMe所屬銀行了解，但誰知折騰45分鐘都未能確認短訊嘅真偽，亦未能夠聯絡到PayMe嘅職員對話，嬲到把幾火嘅EQ決定向金管局反映事件。
建制議員早前遭起底洩密
EQ初時以為，只得自己收到可疑短訊，但尋日同黨友開會期間，銀行職員打電話過嚟道歉，先至發現Ben同劉都遇上類似情況，話單計該政黨13個議員當中就有3人成為不法之徒嘅行騙對象，反映問題相當嚴重，因此將會去警署報警，又會喺立法會跟進事件。EQ猜測，事件可能同建制派議員早前被「起底」，公開電話等個人資料有關，又強調依家社會上起底問題嚴重，認為起底刑事化嘅工作刻不容緩！