政情：潮屬總會選委落空 傳政府適當安排補鑊
中央提出完善本港選舉制度，其中選委會第三界別將新增60席嘅同鄉社團界別，不過人多勢眾嘅潮屬總會竟然冇份，有消息指香港潮屬社團總會（潮總）對安排不滿，話好難向為數高達130萬嘅香港潮州人交代，早前更向特首、民政事務局局長徐英偉同政務司司長張建宗等表達意見，希望政府好好考慮。最新就有傳當局為安撫潮總，將有「適當安排」。不過潮總嘅一眾會董就話唔知情喎。
會董表示冇聽過
對於潮總希望政府考慮佢哋嘅訴求，獲得選委會席位。有指政府已答應潮總，話會喺既定「框架」內作出「適當安排」，令佢哋喺選委會內有其代表性。但本報詢問一眾會董是否已成功爭取，佢哋就話暫時仲未，至今未聽聞有改動。當然亦未知悉所謂「適當安排」嘅具體內容，不過就梗係希望政府有安排啦，又話嚟緊6月上旬潮總將召開會董會，相信屆時會有最新發展。