政情：莫嘉嫻生日願望：平淡食餐飯

母親節禮物冇份 嬲咗老公

莫嘉嫻話由母親節嗰日開始，已經感到唔開心，事關佢當日由朝十晚六一直做嘢，又落區派口罩同禮物。雖然莫都係身為人母，但老公竟然全無表示，仲要指使佢去買飯盒返屋企，當佢一踏入家門發現屋企並無執拾，形容自己塊面就好似關公咁啊。後來佢見到老公所準備嘅母親節禮物，只係送畀家婆而自己就冇份，佢話嗰一刻真係嬲咗！

本周日係莫嘅生日，佢話打算沿用舊年嘅做法，自己物色心儀生日蛋糕然後老公畀錢。誰知佢落柯打之後，先至知老公原來都訂咗個蛋糕，惟有取消訂單。但幸好對方都識得做補救動作，到餐廳訂枱以及約埋契爺契媽一齊食飯。

莫話自己要求好簡單，只要平淡食餐飯就可以，因為喺依家嘅政治氣氛底下，隨時都冇得咁平安食番餐咁話喎。