政情：唔同時段唔同味 尹兆堅還押品水

日前尹兆堅透過社交平台講述近況，佢話獄中生活，離唔開茶同水。佢每日定時將膠水杯伸出鐵欄，負責派水嘅囚友就會幫手將水注滿。儘管每日朝早都可以飲上一杯茶，味道非常淡，不過佢都飲得出係一般熟茶葉，似乎係普洱之類。但話淡茶已經係每日少數有味道嘅飲品，好過冇咁話，至於其餘時間都係飲水，雖則派嘅都係清水，但佢漸漸發覺，原來水都有唔同嘅味道，仲話唔同時段派發嘅清水，味道都有些微分別，搞到佢依家飲水都飲得嘴刁，開始講究分級別，又形容係「粗水精飲」啊。

佢又話一邊「品」水，一邊讀信或回信，就係佢喺鐵窗下每日嘅活動，雖然每日只飲水同茶，但坐監都冇乜要求，解渴就好咁話。

譚凱邦熱到難入睡

同樣因涉違反港區國安法被還押嘅前荃灣區議員譚凱邦就話熱到瞓唔到覺。有助理尋日探譚，譚話最近兩星期都狀態一般，首先口腔出現毛病，加上最近天氣酷熱，晚晚除晒衫都難以入睡。譚又話囚室內冇設置風扇，而雖然囚室外走廊係有風扇，但吹唔到床，只有囚室近閘門位吹到風，變相活動範圍得番閘門附近喎。