政情：資方拋怪論：放假仲辛苦

勞方反駁放假休息可增生產力

立法會相關條例草案委員會依家審議緊修例，對於政府提出增加「勞工假」嘅方案，勞資雙方諗法都大有唔同。職工盟組織幹事王宇來話，勞工界多年嚟一直爭取劃一假期，直言已經等得太耐，所以提出明年一次過劃一假期，又話商界應該一早有準備，而唔係好似依家咁如夢初醒。佢又強調劃一假期令僱員有更多假日休息、參與家庭活動，唔單止有助身心健康，提高生產力，亦可減少工傷問題，對僱主都有好處。

僱主憂人手調配 籲循序漸進

之但係，勞工顧問委員會僱主代表、香港工業總會理事郭振華就話，僱主關注嘅唔係增加假期衍生嘅成本，而係考慮到勞動市場供應，擔心人手調配會出問題，所以傾向認為政府嘅方案要循序漸進同穩妥，為商界及市場提供一段較長時間去適應，期間亦可商討實際安排，減少對市場影響。

對於有指多一日假期，唔單止有助員工改善同屋企人關係，仲可以減少員工犯錯嘅機會，郭振華就有唔同睇法。佢話職安健方面可透過法例加強，甚至仲可用AI（人工智能）技術監管，唔一定要靠放假休息去改善。佢仲分享話，聽到身邊好多朋友大呻放假休息仲辛苦過返工喎，如果多咗呢5日假期，佢哋就要用更多時間嚟湊仔女。佢又話點樣可以令員工假日時可以真正放假係一個存有矛盾嘅問題。

王宇來聽到郭嘅言論後，就笑指對方提出「究竟返工辛苦啲，定放假辛苦啲」，係一個哲學性問題，但佢就唔明白放假點解會比返工辛苦，又話以僱員角度，即使放假湊仔、落公園「放電」，心入面都係開心咗，因為起碼有親子時間喎。

其實放假係咪比返工辛苦呢個問題，真係見仁見智，之不過增加「勞工假」係勞工福利之一，相信唔少打工仔都會好歡迎呢個決定。