政情：臨急執草案字眼 傾垃圾徵費又改期
垃圾徵費計劃醞釀逾15年，政府為防再度「胎死腹中」，早前甘願作出讓步，包括承諾向公眾提供18個月嘅適應期。之不過原定喺下星期二（25日）舉行嘅會議要臨時改期喎，莫非又有變數？
配套搞唔掂 廚餘恐續堆填
一直關注計劃嘅飲食界議員張宇人透露，大方向冇變，只係政府要花多啲時間寫好字眼，令市民更容易明白，又指政府早前讓步，話若然食肆妥善回收廚餘，就可以免除有關部分嘅垃圾費，不過張宇人直言唔收貨，事關政府唔肯白紙黑字咁寫落條例草案，只係話喺二讀過程中會口頭解釋有關豁免喎。佢亦提及按現時嘅配套，每日只可處理約200噸廚餘，但係飲食業連同住宅廚餘每日超過3,000噸，佢質疑最終都係會去晒堆填區。
政府為推行新政策，經常都要開設大量新職位。張宇人先前要求政府提交需增加嘅人手安排，不過遲遲未獲回覆。佢批評政府成日側側膊，恃住立法會通過條例草案，日後就冇理由唔畀開位，形容呢個係政府嘅一貫做法，成日都留番條尾啊！