政府工程進度屢被批評慢條斯理，即使項目並非異常複雜，但動輒亦要用上十幾廿年，過去一直惹嚟議員不滿。立法會工務小組委員會尋日開會，討論11號幹線（元朗至北大嶼山段）勘查研究，當局話要用4年半進行相關研究，日後興建就要用多11年時間，初步估計要到2036年先至啟用。議員何君堯聽到之後就非常不滿，鬧爆現行嘅法定程序過分冗長，要求當局盡力壓縮時間，勢要拆牆鬆綁！

政府早喺2018年5月已就11號幹線項目進行可行性研究，早前建議委聘顧問就元朗至北大嶼山段、約10.2公里嘅工程進行勘查研究，涉及約3.19億港元費用。工務小組尋日開會審議有關項目，多名議員不滿要等逾15年先至通車實在係太遲，又擔心未能紓緩元朗嘅塞車問題。

會議間，何君堯就要求政府交代點解勘查研究要長達54個月。當局回應話，其中30個月會進行多項評估，涉及交通、環境、航海、航空，以至土地需求同空氣動力學等各個範疇，又會進行初步設計；至於其餘24個月就涉及刊憲等工作，包括要收集公眾意見、就反對意見進行公眾解說，話係參考咗過去其他大型項目嘅經驗而訂。

之不過，何君堯就不滿勘查研究要花接近5年時間，而興建更要用上11年，話本港憑住過去多年嘅基建經驗，起嘢應該好似當食生菜咁容易，要求當局將兩者所需時間分別壓縮至兩年同6年，重申政府做工程需要有野心、宏願，建議當局應整理好有需要修改嘅法例，話立法會願意配合拆牆鬆綁咁話。

工務小組主席謝偉銓就幫政府解釋，話有關議題涉及多個政策局，故要求出席部門交代相關資料。最終有關撥款申請喺委員支持下，將會交上財務委員會審議。

另外，工務小組同日亦通過另外兩個項目，分別涉及將軍澳中醫醫院發展同成立政府中藥檢測中心，以及西灣河文娛中心、大埔文娛中心同荃灣公共圖書館嘅改善工程。