政情：社民連多人收押 日後鐵窗下開會
社民連秘書長吳文遠因前年10‧1非法集結案，承認組織及參與未經批准集結罪，前日被撤銷保釋即時還押。吳嘅同事尋日喺其Facebook發文話，吳除咗喺荔枝角收押所同支聯會主席李卓人做「鄰居」外，仲話社民連多位成員都喺荔枝角收押所，預告到時可以喺監倉開會添啊！
貼文仲提到吳文遠喺美孚新邨同李卓人做街坊，依家羈押喺荔枝角收押所就做埋鄰居，同陷囹圄梗有偈傾，兩人放言高論，說古道今，真係無所不談。
料黃浩銘曾健成踎監
吳還押第一日仲未碰到社民連成員，但由於社民連兩位副主席梁國雄同岑子杰、常務委員陳皓桓同幹事謝寄安都喺同一個收押所，又預計主席黃浩銘同埋常務委員曾健成都好大機會入獄，所以到時大家真係可以喺監倉開會喎。