政情：黑暴過後 警隊禮品廊重開 鄧炳強5位數買啤啤熊支持

鄧Sir話，睇見警隊禮品廊可以重開，背後真係飽含辛酸，正如接手經營嘅店長Phoebe話，回想兩年前黑暴肆虐，警民關係緊張，某日佢輕敲警車車窗，想話支持吓香港警察，誰知車內警員以戒備嘅眼神打開車窗，問「有咩可以幫到你？」Phoebe話「多謝香港警察」，對方即刻喊咗出嚟。

所戴眼鏡疑同一哥同款

鄧Sir聽完Phoebe分享都不禁鼻子一酸、差點流下男兒淚，幸而好景終於降臨，警民關係重新建立，佢仲用咗5位數買警隊禮品廊名物—身穿警察制服嘅啤啤熊，且係限量版，每隻都有編號，極具收藏價值，話買嚟送畀朋友，肯定大受歡迎。話時話，隻啤啤熊所戴嘅眼鏡，同一哥嗰副好似，莫非造型係參考一哥？至於其他紀念品，有由蕭澤頤主演警隊電影《守城》禮品盒。鄧Sir話，禮品廊有市民支持，係對警隊嘅認同，而一流嘅警隊亦需要有一流嘅禮品廊配合喎。