政情：常秘陰盛陽衰 蔣麗芸：因女性特別乖？
女性公務員嘅總比例喺過去10幾年間有所增加，依家19位常任秘書長中，更有15人係女性。但議員蔣麗芸（阿Ann）尋日喺立法會一個事務委員會上就話，雖然見到呢個情況都開心，但認為凡事都講求陰陽協調，認為公務員事務局局長聶德權作為公務員阿頭，應該關心呢個問題，了解點解咁少男性公務員可以晉升至呢個位喎。
港府：招聘公平 能者居之
公務員及資助機構員工事務委員會尋日開會，唔少議員都關注公務員性別分布問題。對於有咁多女性出任常任秘書長，阿Ann形容「可喜可賀」，但佢就話估計全球嘅首長級官員應該以男性居多，只有某幾個東歐國家係相反，反問係咪女性特別乖所以令佢哋被提拔，仲話擔心依家個情況會影響香港人力資源發展嘅平衡。
聶回應時就話女性公務員數目比例有所增加，香港整體勞動人口都係有相類情況，認為都值得關注。佢仲回想起加入政府數年後，一年以來所聘請嘅政務主任有80%都係女同事，所以依家唔少首長級公務員都係女性。佢又話成個招聘過程都係公平進行，強調係有能者居之。之不過，其實能力同性別無關，依家已經有唔少有經驗嘅女性參與公共事務，如果仲以乖巧就可以升職嘅諗法去思考問題，唔單止標籤咗女性，似乎更係低估咗佢哋嘅工作能力喇！