政情：葉劉斥港府覓地填紙嘥時間
香港有好多深層次矛盾，而房屋就係其中一個。早前有中央領導人曾公開提及，要思考點樣解決香港房屋問題。行政會議成員、議員葉劉淑儀接受網媒訪問時話香港嘅房屋問題要由中央提點，係好慚愧嘅事，批評政府早前成立土地供應專責小組是浪費時間，形容反正都係要人「填點心紙」，即係揀選唔同增加土地供應的選項，但所有選項人人皆知，批評政府喺覓地上浪費時間。
葉劉又批評政府喺劏房問題上做得不足，指政府自恃庫房有錢，處理問題時以為提供補貼就可解決問題，但其實解決唔到。
促研釋放葵涌碼頭用地建屋
點樣解決土地問題？佢認為當局要盡快研究釋放葵涌碼頭建屋，因為碼頭吞吐量一直下跌，社會上有聲音指即使縮少一半都夠用，所以可以撥出一半碼頭土地起樓，交通亦非常方便。佢又建議將整個碼頭搬到長洲南重置，釋放整幅土地，認為呢個唔係遲早要考慮嘅問題，而係要盡快處理嘅問題。佢話房屋問題係民怨來源，政府覓地建屋唔可以放軟手腳。