政情：徐子見辭區議員 議辦結束 轉贈二手傢俬
立法會已通過《2021年公職（參選及任職）（雜項修訂）條例草案》，所有現任區議員都要宣誓擁護《基本法》同效忠香港特區。近月引起區議員辭職潮，參與上年民主派「35+」初選、涉違《港區國安法》，現正被還押於荔枝角收押所嘅徐子見上周宣布辭去東區區議員職務，即日生效。徐嘅區議員辦事處亦都收拾中準備遷出，徐嘅助理日前就喺社交平台貼文，話要轉贈二手家具同物資。
包括木櫃辦公枱電視
貼文中助理表示前議辦有大量二手家具物資，稱如果有街坊、團體，或者其他議辦啱用嘅，可以喺辦公時間內自行安排人手去徐嘅辦事處領取，並附上多張物資相片，當中包括木櫃、辦公枱、電視機、白板同埋鏡等。
其實徐子見嘅議辦可以話係「得來不易」，佢喺2015年底嘅區議會選舉中勝出，擊敗連任20多年嘅前區議員鍾樹根。徐一直想接收鍾樹根喺漁灣邨嘅議員辦事處，但礙於樹根仍然係立法會議員身份，所以能夠繼續用辦事處，徐亦曾因此向申訴專員公署投訴，懷疑房屋署處理不當。