政情：土瓜灣騎呢指示牌
平時喺街道都不難見到港鐵地鐵站指示牌，指示牌當然要顯而易見得嚟，唔會阻住條路，影響到街坊。但最近土瓜灣就出現咗個古靈精怪嘅指示牌，指示牌橫跨行人路，支撐指示牌嘅石屎躉阻住條路，讓人摸不着頭腦。
前九龍城區議員關浩洋喺Facebook貼文，話唔少土瓜灣街坊近日都留意到，區內行人路多咗個好阻碇嘅大型石屎躉，上面掛住個細到唔合比例土瓜灣站指示牌。港鐵回覆查詢時就話，指示牌屬臨時性質，目的係喺屯馬綫通車初期，讓駕駛人士熟習前往新車站嘅行車路綫，將會喺通車一段時間後安排移除，又話指示牌符合有關政府部門嘅設計要求喎。
關浩洋鬧爆話成件事都唔係好合理，又係用「有關政府部門」敷衍回答，質問唔通佢哋嘅設計要求無加入「唔好阻到居民」咩？唔明白指示牌咁細塊，使唔使咁大個躉呀？關鍵係霸住條路阻到人咁話。