政情：違誓遭DQ或追薪 梁志祥：合情合理

身兼南區區議會主席嘅民主黨（白鴿黨）主席羅健熙，指條文中「負面清單」部分條文語焉不詳，又以清單上「作出損害香港整體利益的行為」，同「尋求外國政府或組織干預特區事務」為例，好容易被解讀成唔同意思，覺得有關犯法嘅條文應該寫得清楚啲，批評依家畀人嘅觀感係要對付民主派喎。

斥損港利益 犯負面清單行為

出席同一電台節目嘅立法會議員梁志祥就反駁，認為條文並不模糊，話條例所列嘅正、負面清單已詳述相關行為，強調公職人員本身就應該清晰相關界線，特別係議會嘅議員就更應該知道乜嘢係做得、乜嘢係唔做得，唔會因為推出正、負面清單而造成混亂。佢仲話，有關損害香港利益嘅行為清楚明白，舉例指泛民過往喺議會阻礙開會，就係屬於犯咗「負面清單」嘅行為。

指還押區議員亦應有權宣誓

梁又提到，話議員與外國使節、記者見面當然冇問題，不過佢就強調有關見面唔可以懷有政治目的，或者係要宣揚某啲政治目標喎。佢又形容，違誓後被懲罰同DQ，只係唔畀佢哋再做唔啱嘅事，強調合情合理。其實講真呀，一開始都係民主派唔啱在先，又喺議會諸多阻撓，又頻頻會見外國政治人物，勾結外國勢力，宣揚港獨等，乜都做齊，先出現今時今日宣誓條例，咁又點可以話針對民主派吖？

至於律政司相信有人違誓，可提出法律程序要求法庭作出裁決，惟期間有關議員必須暫時停職。梁認為，目前條例有機制加快法律程序，係符合法律。另外，梁認為正被還押嘅區議員都應該有權宣誓，相信民政事務局屆時會通知所有區議員宣誓咁話。