政情:葉劉籲港府爭取 助年輕港星北上拍節目

內地唔少電視節目未能喺香港跨境播放,有議員尋日喺立法會大會上籲政府開放更多內地電視頻道畀本港居民,亦有議員建議商務及經濟發展局為香港近年爆紅嘅年輕演藝人爭取機會,去內地拍節目喎。

議員促為公屋裝衞星電視系統

話說議員劉國勳建議政府為公共屋邨安裝衞星電視系統,等港人可以睇多幾個內地電視台。點知議員葉劉淑儀就更直接,希望港府為香港廣播業爭取內地市場,話香港最近爆紅嘅年輕演藝人以及跳唱組合好受歡迎,籲商經局爭取吓,畀佢哋上內地電視節目,擴大內地市場都好吖。

葉劉喺會後同記者話,佢所屬嘅政黨有個娛樂小組,專門分析音樂同劇集,對演藝媒介方面好有研究,葉劉除咗對香港當今嘅年輕偶像瞭如指掌,亦大讚內地好多明星都好專業。佢話香港年輕人靠自己努力搵到出路,喺本地娛樂圈站穩腳跟固然係好事,不過喺內地搵食嘅話,分分鐘賺到億億聲咁話!

第一手消息請下載on.cc東網iPhone/iPad/Android/Windows Phone Apps