政情：葉子祈冇戴罩被聲討 大鬧巴士死撐小事

叫擺脫「疫情嚴峻」恐懼

葉子祈喺貼文中話，假設有人喺街上冇戴口罩會被視為「播毒」，即使嗰個人健康，旁人都會話：「點知你有冇病」，佢仲話所有有關抗疫政策或法例都冇經過「合理」程序去完成，包括所有荒謬嘅隔離、強制檢疫、地區封鎖等，全部都係以「公眾健康」之名要所有市民服從。

對於冇戴口罩，佢仲話「口罩戴與不戴實在只是無聊小事」，冇諗過會被廣泛報道，佢仲話希望市民早日擺脫「疫情嚴峻」嘅恐懼，開始反思自己應該捍衞嘅自由。

網上流傳嘅短片所見，佢喺巴士內被其他乘客聲討，而佢亦喺車廂內叫囂「你有冇辦法證明我一定係傳播病菌？我有冇周圍去噴口水，做出一啲違反公共衞生嘅行為呀？」好多網民都喺葉嘅Facebook專頁留言鬧爆，又要求佢要就事件公開交代。