政情:區議員宣誓前夕 周琬雯跟風辭職

立法會將於周三恢復二讀辯論《2021年公職(參選及任職)(雜項修訂)條例草案》,修例後所有現任區議員均須宣誓擁護《基本法》及效忠香港特區。修例草案審議前夕,再多一名區議員宣布辭職。公民黨(公文袋)深水埗區議員周琬雯,前晚喺社交平台發貼文,話自己已向深水埗區議會主席楊彧遞交辭職信,其區議員職務將於下月1日終止。

至於因何辭職,周就話「基於私人理由」,跟住又補充一句「明就明」,希望一眾街坊能夠理解佢所做嘅決定。睇番公文袋喺2019年區議會選舉中,成功喺深水埗區嘅美孚北、美孚中同美孚南3個選區插旗,但隨住身兼區議會副主席嘅美孚中選區區議員伍月蘭喺舊年7月退黨,加上周琬雯辭任區議員,公文袋喺美孚3區只係得番喺美孚北擔任區議員嘅李俊晞。

政府提修例 至少10人劈炮

自政府提出修例以嚟,至少有10名區議員請辭,包括涉去年民主派「35+」初選案嘅譚凱邦、范國威、林卓廷同李嘉達等。政界預計,當修例草案喺立法會通過後,會陸續再有區議員辭職。

第一手消息請下載on.cc東網iPhone/iPad/Android/Windows Phone Apps