政情：失區議員資格 求推翻結果 洪駿軒眾籌失敗棄上訴
泛民主派嘅觀塘區議員洪駿軒，今年2月被高等法院裁定非妥為當選，並於日前失去區議員資格。雖然早前佢揚言上訴，不過尋日佢話按目前眾籌所得，以及所屬政黨都難以支持佢單官司，決定撤回上訴申請喎。
目標100萬 僅得15萬
洪駿軒喺今年3月提出上訴，希望籌得100萬元支付訟費，然而最終只係籌得約15萬元，加上多名黨友都有官司在身，黨內經濟狀況實難以支撐，況且經諮詢法律意見後，認為勝訴機會唔大，惟有放棄上訴。
不過洪話未來會視乎政治形勢，考慮參與區議會補選，亦冇打算離開香港。佢喺社交網站發文話最壞嘅情況，係未來兩年半都唔會有區議員服務當區居民，但佢會肩負未完成嘅責任，繼續從事社區工作。而眾籌所得嘅金額將會全數用於支付訟費。
洪係被指於前年區議會選舉期間，喺拉票傳單中抹黑對手以「假獨立」欺騙選民，之後喺選舉呈請中被裁定為非妥為當選，係今屆首宗區議員被取消資格嘅案件，如今佢已經喺5月4日正式失去議席。