政情：惹火雷鼎鳴 任公務員敍用會委員
政府尋日刊憲宣布，委任香港科技大學經濟系榮休教授雷鼎鳴，為公務員敍用委員會委員，任期兩年並於6月1日起生效。其實雷舊年先啱啱獲委任為香港藝術中心監督團成員，莫非佢嘅「惹火言論」特別受關注？
公務員敍用委員會嘅主要職責，係就較高職級公務員嘅聘用同晉升事宜，向政府提供意見，亦會處理公務員嘅紀律個案，旨在確保公務員嘅聘用同晉升制度公平公正，同埋確保整個公務員體系恪守大體一致嘅懲處原則。
過往不少言論受批評
雷鼎鳴過往曾發表唔少惹火言論，例如2017年佢喺研討會上發表「叫雞論」，話朋友喺內地召妓都係用手機付款，從而表示支付方式好方便，但當時就惹來輿論狠批，斥佢身為教授措詞不當、侮辱女性。唔知今次佢去到公務員敍用委員會，又會有乜嘢新火花呢？