政情：醜態百出 陳肇始有病就唔好死頂 鄭若驊拎錯文件要人等
新冠肺炎襲港一年有多，政府抗疫工作屢被炮轟。單睇主責抗疫工作官員嘅日常表現，就知道點解做得咁差。食物及衞生局局長陳肇始尋日出席立法會會議期間，懷疑因身體抱恙，以至鼻水直流，但護士出身嘅陳竟然選擇直接喺會議廳除低口罩抹鼻涕！
陳肇始尋日開會時疑感不適，佢先捽一捽眼，然後當住全場幾十位議員面前，毫不避忌咁除低口罩抹鼻。查實戴口罩嘅目的係保障自己同身邊嘅人。之不過，呢個連小學生都識嘅道理，睇嚟本身係護理系教授嘅陳反而已經唔記得咗，好心佢病就唔好返工啦。
但甩轆嘅唔止陳肇始喎。律政司司長鄭若驊喺立法會審議《內地婚姻家庭案件判決（相互承認及強制執行）條例草案》期間，疑似拎錯文件又搵唔番，跟住話「嗯？對唔住呀」，跟住又講多次對唔住，議員就默默等佢搵文件。其實官員踏入議會之前就應該準備好文件，身為司長點解咁都可以咁草率o架？
