政情：坐35日疫監袁莎妮煮食解悶

新冠肺炎疫情下，唔單止確診者嘅緊密接觸者需要隔離，由海外回港嘅人士都要隔離，好多人都感嘆坐「疫監」無聊。香港總商會前總裁袁莎妮（Shirley）早前由海外回港時，都被強制隔離21日，Shirley就日日煮嘢食解悶，仲講笑話「21世紀婚姻最大敵人係quarantine（隔離）」啊！

Shirley喺上月25日凌晨終於結束隔離，可以返屋企，加埋之前喺海外隔離嘅14日，總共隔離咗35日。佢仲講笑話同丈夫坐咗咁多日疫監，都無出現到家暴或者嗌離婚，形容係兩人之間嘅一個考驗。

但隔離咁多日有咩搞作呢？Shirley就話網店喺世界好多地方都發展成熟，買食材都好方便，而佢之前有一段隔離時間住喺服務式公寓，加上搭完飛機返嚟有時差，所以每日一瞓醒覺就煮飯食。Shirley都笑言咁煮法唔肥就奇，所以佢都有做吓運動，除咗練習瑜伽同跑步外，更開始嘗試玩八段錦同埋拍打功添啊！

政情：坐35日疫監 袁莎妮煮食解悶