政情：留案底保安冇得做 容偉業搣「隊長」稱號
因參與2016年旺角暴動，被法庭裁定兩項暴動罪及一項襲警罪成而判囚3年、有「美國隊長」之稱嘅社運人士容偉業，今年3月中刑滿出獄，但礙於留有案底而無法重操舊業。儘管現時已獲某間社企嘅僱用，但同時佢又宣布引退，話要搣甩「隊長」嘅稱號，選擇做番一個平凡人咁話。
改行食品加工送貨
曾經從事保安員工作嘅容偉業，因留有案底必須轉行。幸好有一位跟進佢嘅個案長達9年嘅教會社工幫手，搵到一份工作自力更生，依家佢就喺一間社企裏面負責食物加工同外勤送貨，話想學啲新技能，希望一步步發展事業。雖然容都好鍾意人家叫佢做「美國隊長」，但由於社工曾經對佢千叮萬囑，要將「隊長」嘅身份收埋喺籠底，於是佢聽從勸告，回歸平淡。至於容當年手持嗰塊美國隊長盾牌，一早就畀屋企人揼咗喇。