政情：沙田區議員 黃文萱退出公民黨
再有區議員決定退出公民黨（公文袋）！本身係公文袋執委嘅沙田區議員黃文萱，尋日喺Facebook宣布退出公文袋，又表示日後唔打算宣誓擁護《基本法》同效忠香港特區。至於幾時辭職？佢就話目前打算係做到最後一刻喎。
議辦曾掛港獨旗幟
《港區國安法》自去年6月30日深夜生效後，黃文萱仍然喺佢嘅議員辦事處內，掛起一面被外界視為「港獨」嘅旗幟，一度被警方調查，並要求佢拆除有關旗幟。
而自今年2月開始，至少6名區議員已宣布退出公文袋，包括荃灣區議員黃家華、黃大仙區議員鄭文，以及觀塘區議員李煒林、李軍澤同畢東尼。
此外，政府尋日刊憲宣布3個區議會議席出缺，其中觀塘區議員李嘉達嘅協康選區議席，已經喺上月19日起懸空；至於畢東尼嘅觀塘麗晶選區議席，同埋袁浩倫嘅北區清河選區議席，就將會喺6月1日懸空。