政情：變種病毒攻城 議員提緊急質詢遭拒

葛珮帆關注嚟自高危地區嘅航班抵港，促請政府制訂緊急應變措施。（胡家豪攝）

有議員去信建議喺立法會下周三大會上，提出遏止海外變種病毒嘅緊急質詢，不過內會主席話過咗限期唔會納入議程。議員就乘機各抒己見，議員葛珮帆話仍然有嚟自高危地區嘅航班抵港，促政府制訂緊急應變措施。議員何君堯就話，市民好關心變種病毒情況，希望當局可以第一時間澄清社會同網絡流傳嘅訊息。主席就話其實衞生事務委員會就快舉行會議，議員亦可以透過唔同場合向官員表達意見。

• 何君堯就希望當局可以第一時間澄清社會同網絡流傳的訊息。

拒安排外傭強檢 羅致光捱轟

但議員麥美娟就直指「你容許同事講，我都要喺度講」，佢批評勞工及福利局局長羅致光早前拒絕安排外傭強制檢測，但依家咪出事囉，希望政務司司長張建宗督促羅唔好再自以為是、唔聽人講，否則真係會畀佢累死。仲有作為帳目委員會主席嘅議員石禮謙都趁熱鬧，佢提到審計署同入境事務處就審計報告有拗撬，希望張建宗提醒部門避免公開評論報告喎。各位議員講極唔停，內會真係混亂一片呀。