政情：區議員宣誓在即 吳兆康跟隊辭職
因政府即將修例要求區議員宣誓，過去一段時間已陸續有區議員宣布辭職。至尋日傍晚時分，民主黨（白鴿黨）中西區區議員吳兆康亦喺社交網站發貼文，宣布辭去中西區半山東選區區議員議席，下月起生效。
涉及區議員宣誓嘅《2021公職（參選及任職）（雜項修訂）條例草案》，將於5月12日交付立法會大會恢復二讀辯論。一旦修例草案獲立法會通過，所有現職區議員將被要求宣誓擁護《基本法》同效忠香港特區。若被判定拒絕或忽略宣誓，或者違反誓言等，有關人士將會被褫奪區議員資格（DQ），而且喺5年內不得參與相關選舉，或擔任由相關選舉而來嘅公職。自政府宣布修例後，至今已有至少11名區議員宣布辭職，包括涉民主派「35+」初選案嘅林卓廷、范國威同譚凱邦等。