政情：斥港島南發展差 郭偉强：政府抵打
有工會尋日成立「築活港島」團隊，就政府早前列於《施政報告》嘅「躍動港島南」計劃，提出包括重塑漁民文化、連結親水文化、改善水路及陸路交通接駁等11項建議，同時批評政府發展缺乏民間合作，議員郭偉强更直言：「政府抵打！」
郭偉强認為香港仔中心係南區嘅核心地段，但始終缺乏港鐵站，促政府盡快開通南港島線西段鐵路，令到香港仔中心同黃竹坑得以連繫。香港大學建築系副教授鄭炳鴻就話，港島南有唔少歷史建築已成為港人回憶，政府應加強推動保育，又稱港島南區嘅漁民希望有商業行為，促請政府推動市民可沿海岸線接觸水上人家。此外，團隊又話將會喺南區透過交流活動收集民意，及後會向政府反映社會聲音。