政情：中聯辦鬧「反華政客」慢半拍 夏博義跪低撐國安法

事隔幾日，中聯辦先至批評夏博義係「反華政客」，為違法者張目。但其實夏博義「偉論」都講咗一段時間，仲有人踢爆夏博義曾任英國市議員，中聯辦依家先質疑人哋「反華」，會唔會遲咗啲呀？

夏博義被中聯辦狠批完之後，日前接受傳媒訪問時話已退出英國自由民主黨，強調自己並非政客亦唔「反華」。佢又澄清自己對國安法嘅立場，話一直認為國安法屬合法及必須，因為大多數國家都有訂立維護國家安全法例，但大律師公會對個別條文有意見，日後會向政府提交修改建議書。

疑受大律師公會同僚施壓

對於夏博義嘅言論，中聯辦遲來發聲鬧爆，而夏博義就畀人鬧爆之後先嚟澄清，一次過推翻晒自己過往言論。理工大學專業及持續教育學院講師陳偉強話，事實勝於雄辯，其背景及過去言論令人質疑，背後動機顯而易見，又話佢今次「跪低」，相信有同僚及執委向佢施壓，擔心特區政府收回頒授嘅資格。