政情：拍兩分鐘除夕倒數片狂燒錢 商經局：僅花362萬
舊年本港嘅除夕倒數煙花匯演因疫情而取消，旅遊發展局就改為網上播放預製短片。之不過，當局早前喺立法會財務委員會上透露，有關開支約900萬元，即時就被議員狠批浪費公帑。商務及經濟發展局最新透過書面形式補充，將除夕倒數活動嘅相關開支向下修訂至834萬元，又透露同短片相關嘅開支只有362萬港元。唔知係咪畀議員鬧爆，所以要急急走出嚟補鑊呢？
繽紛冬日節亦花945萬
商經局表示，當局花費150萬港元去設計同製作該條片長兩分鐘嘅短片，另外使咗212萬元做推廣同宣傳，同埋安排國際傳媒機構做直播或轉播。至於其餘472萬元使咗去邊？商經局就解釋，係本身計劃舉行實體煙花匯演嘅相關開支，例如籌備工作同外購煙花嘅費用等等。照咁睇，一條短片耗資逾300萬，呢筆支出都唔算相宜。
另外，商經局亦交代上年度「香港繽紛冬日節」合共用咗945萬元。但舊年政府取消舉辦實體嘅聖誕小鎮，無豎立巨型聖誕樹同布置裝飾，但所涉嘅相關開支就高達301萬元。當局又指，儘管舊年搞唔到實體活動，但就話啲裝飾會留番日後再用！而取代實體活動嘅網上虛擬活動及宣傳，就用咗644萬元，巨額花費睇嚟一啲都唔輸蝕網上煙花短片喎！