政情：公帑枉花 港台被轟 執咗佢喇
香港電台（港台）近年屢被批評節目內容偏頗，尋日再抽起原定晚上播出嘅《鏗鏘集》。咁都不特止，話說舊年3月播出嘅外判節目《台灣故事III》更被投訴涉違「一個中國」原則，而通訊事務管理局尋日亦裁定相關投訴成立並發出勸喻。有學者同議員都炮轟港台劣績斑斑，拍完節目又唔用，簡直係浪費公帑，如果政府最後都係管唔掂，不如執咗佢好過嘞！
繼早前抽起粗口樂隊訪問同原定月中播出嘅《議事論事》後，今次係新任廣播處處長李百全第三次叫停節目。據悉，抽起嘅《鏗鏘集》係探討資助大學學生會斷莊嘅現象，訪問對象唔單止中大學生會當選內閣「朔夜」成員，仲有議員容海恩同劉國勳等人士。
承認涉事節目欠缺持平準繩
冇耐，通訊局宣布經審議有關《台灣故事III》投訴個案後，裁定有關節目準確性投訴成立，決定向港台發出勸喻，敦促佢嚴格遵守《電視節目守則》中嘅相關條文。翻查資料，涉事節目一集題為「斷交之後」嘅旁白內容，曾用「兩國嘅邦交」形容布基納法索同台灣嘅關係，引起觀眾質疑煽動「台獨」心態同違反「一中原則」。
港台亦喺晚上回應，話喺今年3月起已開始引入全新嘅編輯管理機制，由處長同港台高層管理人員組成編輯委員會，就具爭議性嘅節目喺製作或播出前檢視有關節目，並引入更清晰嘅上報機制，節目製作人員在策劃節目的初階提交計劃書予編輯會議審視。同時證實抽起3個節目，包括《香港故事：疫行者》、《議事論事》同《鏗鏘集》，指相關節目所選取嘅議題均具爭議性，但未能做到持平、不偏不倚同真確準繩，未能符合《約章》及《守則》嘅要求，亦可能牴觸法例或通訊局的業務守則，但全部或大部分製作工作已喺全新上報機制引入前完成，所以唔能夠喺製作前加以糾正。
議員促改革 倡與新聞處合併
立法會資訊科技及廣播事務委員會主席何君堯話委員會喺4月底有個關於港台嘅檢討會，而佢認為若港台已失去其成立嘅原意，應當進行改革，如把港台與政府新聞處合併等，亦唔排除若檢討後認為港台無藥可救，「執咗佢」係最極端情況的選擇。委員葛珮帆就話如果政府管得掂港台嘅話就快啲畀成績佢哋睇，若管唔掂就不如摺咗佢喇！
香港理工大學專業及持續教育學院講師陳偉強狠批港台員工冇理由唔知公司嘅編輯方向，又炮轟港台成日抽起節目，最終都要用公帑埋單好嘥錢，既然近年質素同收視都唔好，又未盡公營廣播機構嘅職能，執咗佢仲好啦！