政情：陸頌雄當黑 發完燒又痛風發作
本港疫情肆虐，除咗要提防新冠肺炎病毒，仲要注意其他疾病啊。之不過議員陸頌雄（Michael）最近接連被扁桃腺發炎同痛風困擾，直言呢排真係當黑啊。
Michael上個星期開始就遭到病痛纏身，起初先係發燒，之後醫生診斷係扁桃腺發炎，以致喺立法會會議上，想質問官員都有氣無力、精神不振。以為佢過咗幾日，應該狀態返晒嚟啦，點知本報記者前日喺立法會撞到佢，見佢雙目無神，行路仲趷吓趷吓，情況仲差過前幾日喎！原來Michael係痛風發作，望落行每步路都好辛苦。不過因為想喺財務委員會上提出問題，決定照樣出席會議。
術數師曾提醒注意健康
其實本報早前邀請一位術數師為議員預測運程，嗰時就話Michael唔止會受「講錯嘢」困擾，仲提醒佢要特別小心自己嘅健康，特別係腰以下，有可能會出現腸胃或者泌尿科問題，仲話連帶配偶嘅身子都要小心啊。睇嚟Michael真係要注意健康啦，不過都有好消息嘅，皆因術數師話Michael今年會行財運啊！