政情：潘國山口裏說抗議 雙腳穿Nike
新疆棉事件不斷發酵，內地抵制相關品牌嘅行動一浪接一浪，藝人網紅以致一般民眾都揚言杯葛，涉及不採用新疆棉嘅外國品牌產品，本港部分政界人士亦緊隨呢個浪潮，公民力量4位成員尋日中午就踩上H&M位於尖沙咀中港城嘅辦公室抗議，要求呢間知名服裝企業為失實及抹黑言論公開道歉，同時收回無理指控。雖然佢哋痛斥得大義凜然，然而寫滿譴責字句嘅抗議標語，都唔及得公民力量主席潘國山對腳咁矚目，因為潘所着嘅Nike波鞋，正正就係今次內地民眾主要嘅聲討對象之一！着錯鞋表忠，點解咁失策呀？
團體成員李梓敬話，近年有部分西方國家領袖同媒體，不斷抹黑新疆狀況，喺毫無證據嘅情況下指控新疆出現強制勞動或種族滅絕，令外國企業盲目跟從，認為係污名化咗中國。雖然有部分品牌已經撤回早前就新疆問題所發出嘅聲明，但H&M仍然冥頑不靈，立場依舊，佢要求H&M停止杯葛，撤回有關言論，重新採購新疆棉花。
李梓敬稱鍾情國產貨
緊跟民族立場嘅李梓敬同潘國山都聲言唔再購買同穿着H&M嘅衣服，直到呢家服裝企業願意道歉為止。李梓敬更自詡鍾情國產貨，譬如自己腕上嘅手錶係價值60元嘅淘寶網貨品，又指自己雙腳都穿着國產品牌飛躍嘅白鞋，於是大家嘅目光都往下移，睇吓睇吓，企喺李梓敬側邊嘅潘國山，竟然着Nike波鞋到場抗議！
潘國山雖口頭話抵制抹黑中國嘅外國品牌，但鞋履嘅選擇就似乎暴露咗佢嘅真實取向。潘隨後搬出環保原因，話唔會銷毀，亦唔會丟棄對鞋，但會向李梓敬多多學習，日後用多啲國產貨喎，以後亦唔會再着Nike波鞋，直至佢哋肯公開道歉。潘講完之後似乎嫌自己「反省」得未夠誠懇，向在場記者一再重申自己以後真係唔會再買呢個品牌嘅產品咁話。
此外，新民黨主席葉劉淑儀亦喺社交平台上載圖片，話佢尋日着Fila波鞋，唔係着另一個惹爭議嘅運動品牌adidas，唔通係借機抽水，暗寸潘國山敏感度不足，冇做好準備就去抗議？