中環出更：為免流會 建制議員離場需知會「班長」
目前議會雖由建制派主導，但立法會早前都試過差啲就流會。雖然唔知班議員係太忙嚟唔到開會定係咩原因，但據了解，建制派近日達成一項共識，議員若然要離開大樓，需知會「建制派班長」、議員廖長江（Martin），而Martin亦會統計人數以免流會。之不過，該項規定並非強制性，會否有人唔聽話呢？
話說議員邵家輝喺本月18日要求記名表決，誰知在席議員人數未符法定要求，搞到Martin喺樓上開緊會都要即刻仆落嚟，儘管最終都湊夠數。但為避免同類情況再次發生，據聞建制派議員早幾日碰頭，最後得出共識，希望每位議員離開大樓前都同Martin講聲。
後生議員被指做嘢冇交帶
有資深建制派議員就話，有啲比較後生嘅議員做嘢冇乜交帶，成日唔知去咗邊、離開又唔講低喎，呻話依家得40幾人，好容易出事（口架）嘛！所以依家有個措施提醒都係好事。另有議員話，議會內絕大多數都係建制派，做嘢都係集體負責制，大家都唔想流會搞到太樣衰，所以都係幫吓大家啫，雖然一眾建制派議員都話措施係好事，但規定並非強制性，會唔會有啲議員會側側膊、唔多覺呢？咁就要拭目以待喇！
卓妮