中環出更：發掘業餘嗜好 林超英：墳場觀鳥一睇入迷
大自然中嘅動植物猶如生態瑰寶，好多香港人喺忙碌嘅工作以外，都會去大自然放鬆身心。天文台前台長林超英自小就熱衷研究天文氣象，後來進入天文台工作，鑑於原本嘅興趣已經轉為謀生職業，於是另覓業餘嗜好，而觀鳥、賞花就係佢嘅終身興趣，尤其是前者更令佢一見鍾情，極之着迷。至於林超英首次觀鳥嘅地方就比較特別，唔係鳥語花香嘅明媚郊野，而係肅穆寂靜嘅墳場！
林超英話墳場觀鳥係有其優點，事關墓園深處，四下無人，雜念不存，咁就發現咗好多平日留意唔到嘅雀鳥，令佢大開眼界，着迷程度就此一發不可收拾。不過一講到觀鳥器材，佢憶述廿多年前，有一個價值3,000蚊嘅鏡頭令佢心儀不已，當時呢個售價等於佢嘅月薪，話自己一直糾結唔捨得買，結果係太太有一日專程去店舖預訂，買鏡頭與否由此就再無懸念，雖然都係要自己畀錢，但好感謝太太貼心支持啊。林超英之後再愛上賞花，佢話唔係用雙眼賞花、觀鳥，而係要用心睇啊。
李健文成為全港首位標本師
至於標本師李健文同樣熱愛動物，兒時已經飼養各種各類嘅爬蟲類動物，包括蛇、蜥蜴等等。然而任何生命都有結束嘅一日，當佢希望可以將寵物遺體好好保存，惟翻遍整本黃頁電話簿，先至發現香港根本冇標本師，而可以參考嘅書籍亦都寥寥可數。惟有自行摸索，當中經歷無數次失敗，先得以成為標本師。之不過，屋企每個角落都幾乎係佢放置嘅寵物同標本，令到媽媽膽戰心驚，一直反對佢從事有關行業。直至某日，佢因標本師嘅成就而得到傳媒報道，媽媽都話感到欣慰啊。
林超英同李健文日前出席龍虎山環境教育中心，一個介紹自然生態嘅展覽。項目經理鄭頌賢（Joanne）提到龍虎山雖然係全港最細嘅郊野公園，但竟然設有最多涼亭喎。事關龍虎山喺1998年先被劃定，比較年輕，以往一直被市民進行各類活動，如飲茶、小休，甚至開賭檔。所以政府將龍虎山劃定為郊野公園時，有關方面同居民協商，決定設置較多涼亭，供市民進行休閒活動喇。
卓妮