政情：甘文鋒疑被整蠱 Fb專頁一夜增數千like
政界人物畀人整蠱不時發生，最新一位就係屯門前區議員甘文鋒，話說佢嘅Facebook專頁竟然一夜之間驟增幾千個不明來歷嘅網民畀like（讚好），事不尋常即刻刪除。雖然發現得早，不過就話要逐個刪除好嘥時間喎。
多來自東南亞網民
甘文鋒話，疑遭整蠱嘅個人專頁過往只得千多個like，且絕大多數都係屯門區嘅街坊。但喺呢個月17日佢打開專頁檢查嘅時候，發現like人數有唔尋常嘅增幅，竟然較前一日多咗4,000幾個like，於是仔細咁去睇吓到底係啲乜嘢人畀like啦，發現當中以來自東南亞網民居多，於是就將呢批素未謀面嘅網民逐個刪除，然而數量實在太多，去到近日都仲刪除緊佢哋，不過上升嘅數量就慢咗落嚟，依家專頁畀like嘅人數都仲有近1,400人。
咁呢幾千位新增嘅東南亞網友又有無喺專頁留言呢？甘文鋒就話無，並相信好大機會係假戶口。對於今次事件，佢懷疑自己畀人整蠱，雖然難以猜測對方嘅動機，但佢話如果平時無檢查得咁密，過多幾日啲like去到一萬個，可能畀人做新聞話佢買like。