雖然政府銳意將香港發展為「智慧城市」，不過一去到稍為偏遠少少嘅鄉郊地區，網絡依舊係第三世界嘅水平。早幾年立法會批咗筆7.7億撥款畀政府，搞資助計劃促使固網商將光纖網絡擴展到鄉村村口。可惜村民等咗幾年，有議員話鄉郊依家仍無法擺脫龜速上網嘅日子。而政府早排就話，預計偏遠地區要2025/26年度先會完成晒鋪設光纖嘅工程。搞咗咁耐都仲要等，負責統籌工作嘅通訊事務管理局辦公室有無諗到鄉郊居民嘅處境呢？作為總監嘅梁仲賢應該要檢討吓啦！
