政情：疫下遊人逼爆 長洲垃圾滿瀉
長洲遊客人數多，但長洲人未必笑呵呵！疫情下冇得去外地旅遊，唔少人轉戰鄉郊同離島，但亦為呢啲地方帶嚟唔少問題。喺長洲擔任區議員嘅梁國豪，日前就喺社交平台上載相片，見到啲垃圾唔單止裝滿咗成個垃圾桶，仲塞爆埋隔離嘅分類回收桶，更有唔少垃圾散落喺附近。衞生問題咁嚴重，莫非係負責清掃街道嘅食物環境衞生署唔做嘢？
推動本地遊 配套欠完善
梁就話，自己係喺早前某個周末影呢張相，提到自疫情爆發後到訪長洲嘅遊人激增，為島上帶嚟惱人嘅垃圾問題，形容情況喺某幾個旅遊熱點都特別嚴重，例如一落船、滿布小食店舖嘅中央廣場，同埋東灣等地。佢話，自己曾經約見食環署討論呢個問題，署方都只係建議話增加多啲垃圾桶同人手清潔，但佢就質疑到底要增加幾多，先清理得切呢？
佢又提到，查實日本、韓國街頭嘅垃圾桶數目都唔多，但港人去旅遊時都唔會亂揼垃圾，覺得要加強呢一方面嘅宣傳同教育。佢又批評，政府一方面推動本地遊、留港消費，但另一方面又唔去完善配套設施，鬧爆做法好無前瞻性喎！