政情：踎監都懶叻 譚得志讚自己貼信封快
47名發起或參與去年民主派「35+」初選人士，涉嫌違反《港區國安法》，被控串謀顛覆國家政權罪。一眾被告雖身陷囹圄但都仍有細藝，事關佢哋得到監獄職務，貼信封成為佢哋嘅熱門工作添。人民力量副主席譚得志（快必）仲得戚咁話自己快手，反指前公民黨議員楊岳橋同譚文豪手腳慢喎。
寸楊岳橋譚文豪手腳慢
有人民力量成員代快必傳話，話佢最近開始「打工」貼信封，仲懶叻咁講自己貼得快，可以賺多啲錢，不過都係覺得時薪太低喎。佢仲反指兩名「專業人士」楊岳橋同譚文豪就手腳慢喇。既然泛民鍾意咩都比一餐嘅話，反正仲有排踎，不如喺獄中慢慢比賽喇。估唔到身處獄中，快必都照樣闖禍，仲畀人篤爆添。原來佢倒瀉咗白膠漿，要用自己嘅毛巾清理，搞到依家唔夠毛巾用喎。
話說快必早前被控多項發表煽動文字，以及公眾地方作出擾亂秩序罪而被捕，自去年9月開始還押，其後喺荔枝角收押所被加控《港區國安法》罪名。