中環出更：修改議事規則 謝偉俊：拉咗「犯罪集團」都要立規

委員會冀取消打鐘點人數

對於外界關注反對派已經總辭、離開議會，為何仍需修改議規？委員會主席謝偉俊認為議會雖已鮮見失序場面，但「拉咗犯罪集團」，唔代表可以取消修例，因為規矩唔少得。謝強調修例並非針對某一個人或政黨，而係整個制度。又指以往立法會主席雖可驅逐議員離場，但佢哋反而竊喜，乘機「出去食吓煙、飲吓酒」。謝指《議事規則》屬殖民地時期遺物，條文不足、被個別政黨或議員濫用就須修改。此外，委員會冀取消「打鐘」點人數嘅方式，主席可以將極不檢點議員暫停職務，交付議員表決後實行。首次被罰會被禁止參與會議一個星期，再被罰的話「停賽」期就會倍增。另外亦考慮會否向行為不檢點嘅議員實施「經濟制裁」。對於有建制派喺內會討論時認為罰則「重手」，謝就話相較之下，英國國會嘅罰則更嚴厲。

有份提出修訂嘅議員盧偉國，批評反對派喺議會拉布成為常態，而情況更蔓延到各個事務委員會，審批撥款期間動輒出現數千條修訂，惹來「拉布攻防戰」。議員張宇人同樣有份提出議事規則修訂，張狠斥反對派「日日喺立法會做騷」，又意圖拖垮政府施政，冀修訂議規之後能堵塞漏洞。

卓妮