中環出更：電子消費券逐次派 梁天富：難刺激消費意欲
為刺激疲弱嘅消費巿道，政府早前宣布派發5,000元電子消費券，無論永久居民還是新來港人士，總之年滿18歲，去到暑假就可以申請。平白多咗一筆錢可以運用，巿民都應該眉開眼笑，不過善德基金會副主席梁天富就對今次計劃有保留，莫非佢嫌金額太少，還是另有原因？
其實梁天富係對消費券採取分期發放有意見。佢話消費券分5個月派發，每月1,000元既不可累積使用，餘額亦不得撥落下期，筆錢唔用的話就會逾期作廢，形容此舉猶如家長每個月派零用錢畀小朋友，擔心一次過用光筆錢而限制金額。梁天富認為巿民如何使用呢筆錢，政府無可置喙，又建議放寬規定，容許累積消費，增加彈性，先至更有效咁鼓勵港人消費意欲。況且逐次發放，手續繁複之餘行政費亦可能居高不下，不如一次過派發仲好啦。
石禮謙：要順應市民選擇
地產及建造界議員石禮謙就認為政府應該要大方啲，事關消費券嘅錢其實係公帑，並唔屬於政府。既然要回饋市民，市民鍾意點運用都係巿民嘅選擇，石禮謙覺得消費券金額一次過發放會較為理想。如果畀佢收到消費券就會用嚟做善事，捐畀有需要嘅人用。
至於南旋集團副主席王槐裕就話，本港首次派發電子消費券嘅計劃，所涉及嘅行政費竟高達6億元，希望政府可以想方法，以較低成本執行相關措施，並將節省所得嘅資源用於基層或有需要市民身上。至於消費券將來一旦到手，會諗住點運用呢？佢話要提振本地商戶的話，消費券當然係要盡快使用，不過佢又話，唔排除同屋企人將呢筆錢捐贈畀慈善機構。
卓妮