政情：陸頌雄屙到周圍係 化身公廁洗淨師

導師批評清潔步驟錯晒

原來Michael係拍緊宣傳片，鼓勵大家就讀公廁清潔實務知識基礎課程。佢喺片頭已經「犧牲色相」、扮去廁所，仲畀人鬧屙到周圍都係添！佢之後化身「公廁洗淨師」，話人稱「大咪哥」嘅佢向來神出鬼沒，每次出現總係令人眼前一亮，有黑長褸、黑超、仲有標誌性嘅兩支「槍」。咦，原來係兩支玻璃清潔劑喎。

「大咪哥」接受任務，包括清潔廁所、洗手盆同玻璃鏡，自以為洗完乾淨到冇朋友。之不過畀導師批評清潔步驟錯晒喎！唔單止用錯清潔用品，連最基本嘅手套都冇戴，真係失禮晒喇。Michael話原本以為洗廁所人人都識、根本冇難度，接受挑戰先知自己有好多甩漏。認為清潔工作唔簡單，要專業培訓，仲向一眾清潔工友致敬添！