政情：泛民缺勤目中無人 區會何日清理門戶

話說「監察葵青」喺社交平台發貼文，話葵青區議會有多名泛民區議員喺過去一年內缺席、遲到、開開吓會走人，甚至突然暫停會議以便佢哋召開自己嘅「黨團會」。監察葵青發言人朱麗玲就話，上述情況經常出現，有時泛民區議員並非喺會議室開會，反而自行決定開會地點添。佢話地點、時間都已經係由泛民決定，但竟然仲會有人缺席同埋遲到，真係令人匪夷所思。

建制派稱屢受不公平對待

咁當區嘅區議員又點睇呢？Jody話明白區議員有其他嘢做，自己都做唔到百分之百嘅出席率，之不過部分區議員就真係經常缺席，感覺上就唔係咁盡責喇。對於有泛民區議員喺會議上召開黨團，Jody就話真有其事，仲批評話區議員應該為各自嘅選區服務，開會期間都唔應該突然搞小圈子討論，感覺上建制派就好似被排斥。佢又認為每個政黨喺開會前應該進行內部溝通，批評開開吓會突然另開黨團會，觀感上真係唔好睇囉。

盧婉婷就話區議會過去一年，建制派屢受不公平對待，部分泛民嘅同事更加唔尊重建制派添。佢話建制派發言期間，多次被泛民區議員圍攻，導致聲疊聲，更加令佢感覺極其惡劣；反觀泛民議員有時手都唔使舉就可以隨便發言，亦都唔會有人阻止，批評區議會出現雙重標準呀。

梁永權辯指失言非十惡不赦

咁泛民區議員點回應呢？梁永權回覆話，首先自己並冇缺席咁多次，認為有人刻意誇大數字，又話自己每次遲到都係遲幾分鐘，其實並無大礙，覺得有人無理攻擊。唔單止咁喎，佢話建制派區議員都成日遲到早退，喺大會或者委員會坐到完會嘅次數係絕無僅有呀！

之不過，對於有泛民區議員喺會議上話要開黨團，梁永權就不得不承認喇，笑言有部分經驗不足嘅同事失言、不懂修飾，其實當時佢哋只不過係會議上遇到分歧，所以想休會幾分鐘討論吓啫。佢仲話會議後都有進行內部討論，建議新同事發言期間用番議會用詞，唔好鬧出笑話。但佢又補充話同事唔成熟的確有少少失言，唔係十惡不赦，反指建制派藉故大做文章。