政情：中環出更：直播帶貨登陸香港 楊立門仍鍾情門市購物
線上營商嘅手法一日千里，內地近年興起網紅或明星喺網絡直播中推介產品。有「AO歌王」之稱嘅民政事務局前常任秘書長楊立門，都有留意到呢種稱為「直播帶貨」嘅線上銷售手法亦已登陸香港。不過佢作為消費者，自己都係比較鍾意去門市購物，就好似買衫咁，覺得非要試上身睇吓啱唔啱心水，先至掏腰包買喎。
其實楊立門都有幫襯過線上購物，但都係以購買家居用品或食品居多。至於有無試過唔愉快經驗如貨不對辦，佢就話無，仲話依家線上購物競爭咁激烈，為免得失客人相信相關嘅網店都會退換貨品。睇嚟佢喺網上消費時都好小心謹慎啊！
史立德：內地市場商機無限
內地嘅營銷方式推陳出新且發展蓬勃，仁愛堂董事局前主席史立德就話，香港製造嘅產品喺內地有一定知名度，好多省市嘅民眾都覺得香港嘅商品較為高檔次以及有品質保證。佢又話內地市場人口多、商機無限，認為香港雖然起步較遲，但「遲有遲做」，相關機構應該要乘勢協助本地商家發展網上銷售平台，打入內地甚至其他國家城市嘅市場。
隨住營商方式有所改變，物流運送上都要予以配合。速遞公司嘅電商物流項目負責人葉浩霖指，喺處理「直播帶貨」嘅物流程序上同傳统網購唔同，由於網紅同明星嘅知名度都較高，連帶佢哋喺物流上都要提供相應嘅服務質素，以高效同快速方式處理貨品。佢又話有啲「帶貨」活動連續舉行幾日，必須清楚掌握網紅同商家就發貨送貨流程所達成嘅協議，得以更順暢咁完成物流過程。
卓妮